Kökuveisla á aðfangadagskvöld

Kvöldmaturinn á aðfangadagskvöld var hefðbundinn, það var súpa í forrétt og hamborgarhryggur. En eftirrétturinn var með nýjum hætti. Kristín Helga hafði verið að baka fram á rauða nótt á Þorláksmessu og bauð eftir matinn upp á kaffiveitingar sem hún hafði algjörlega séð upp sjálf. Það var kransakaka, bananaterta og marensterta. Kristín Helga sagðist hafa valið uppskriftirnar úr Nóa Sirius 2001 bæklingnum.

Gjafir  opnaðar

Stærsti pakkinn kom vestan úr Bolungarvík og það var gólfteppi sem á að passa mjög vel við nýja parketið.  Kristín Helga valdi gjöf til fjölskyldunnar í Bolungarvík, hún gaf svona innigosbrunn sem við keyptum í Rúmfatalagernum rétt fyrir jól. Það leið víst langur tími á þeim bæ þangað til þau föttuðu hvað væri í pakkanum en við fréttum að í sveitabænum á Hanhóli í Bolungarvík hafi fólk notið aðfangadagskvölds við lækjarnið eins og á hásumri.

Ásta fékk skauta, eyrnalokka, ullarsokka, sjal,  gjafabréf á útsölurnar og nokkrar bækur. Kristín Helga fékk Nokia 3110 farsíma og þar með eru 16 af 20 í hennar bekk komin með farsíma. Hún fékk líka hlaupaskó sem geta breyst í rúlluskó, tvær peysur, munnhörpu, nærföt, bækurnar Prima Vera (matreiðslubók) og Saga veraldar.

Kristín Helga gaf nokkrar gjafir sem hún hafði sjálf gert. Sumar hafði hún ekki náð að klára alveg eins og þessa fínu húfu sem hún er með á prjónunum og gaf pabba sínum. Hún gaf honum líka gifsstyttu af snjóköllum með bláar húfur. Kristín Helga gaf Ástu trefil úr "funny"garni sem hún er næstum búin með.